სამართალი
შეიარაღებული თავდასხმის შედეგად 4 ახალგაზრდა დაჭრეს, მათ შორისაა მორაგბე ლაშა საჯაია
შეიარაღებული თავდასხმის შედეგად 4 ახალგაზრდა დაჭრეს, მათ შორისაა მორაგბე ლაშა საჯაია

თბილისში, შეიარაღებული თავდასხმის შედეგად 4 ახალგაზრდა დაჭრეს. შემთხვევა ცოტა ხნის წინ ზემო ვეძისში მოხდა. დაჭრილებს შორისაა საქართველოს ახალგაზრდული ნაკრების ყოფილი წევრი მორაგბე ლაშა საჯაია. შსს-ს მიერ გავრცელებული ინფორმაციით, მომხდართან დაკავშირებით გამოძიება სსკ-ის 19-109-ე  და 236-ე მუხლით მიმდინარეობს.

„შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს სამმართველოში შემოვიდა შეტყობინება, რომ რესპუბლიკური საავადმყოფოს გადაუდებელი დახმარების განყოფილებაში შეყვანილ იქნა ოთხი ახალგაზრდა მამაკაცი, რომლებსაც, სავარაუდოდ, ცეცხლსასროლი იარაღით მიყენებული ჭრილობები აღენიშნებოდათ.

შეტყობინების მიღებისთანავე, რესპუბლიკურ საავადმყოფოში გამოცხადდნენ ვაკე-საბურთალოს სამმართველოს მე-3 განყოფილების თანამშრომლები.

ცხელ კვალზე ჩატარებული საგამოძიებო მოქმედებების შედეგად დადგინდა, რომ თბილისში, ვეძისის დასახლებაში, დაახლოებით, 19:00 საათზე, ურთიერთშელაპარაკების ნიადაგზე, დაჭრის ფაქტი მოხდა. დაჭრილები არიან: 1998 წელს დაბადებული ზ.ღ., 1996 წელს დაბადებული ლ.ს., 1993 წელს დაბადებული გ.ს. და 1996 წელს დაბადებული გ.ხ.

ამ დროისთვის, შემთხვევის ადგილზე შინაგან საქმეთა სამინისტროს კრიმინალური პოლიციის და საპატრულო პოლიციის თანამშრომლები, ექსპერტ-კრიმინალისტები და კინოლოგები მუშაობენ. პოლიციამ ამოიღო, სავარაუდოდ, დანაშაულის ჩადენის იარაღიდან გასროლილი ტყვიების მასრები, რომლებზეც დანიშნულია შესაბამისი ექსპერტიზები.

გამოძიება მიმდინარეობს საქართველოს სსკ-ს 19-109-ე მუხლით, რაც დამამძიმებელ გარემოებაში განზრახ მკვლელობის მცდელობას გულისხმობს და 236-ე მუხლით, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარებას გულისხმობს.“- აღნიშნულია შსს-ს მიერ გავრცელებულ განცხადებაში.