საზოგადოება
პაციენტს ერთ-ერთ სამედიცინო დაწესებულებაში რეკომენდაციად ლოცვა გამოუწერეს
პაციენტს ერთ-ერთ სამედიცინო დაწესებულებაში რეკომენდაციად ლოცვა გამოუწერეს

პაციენტს თბილისის ერთ-ერთ სამედიცინო დაწესებულებაში რეკომენდაციად ლოცვა გამოუწერეს. 

„რეკომენდაცია: ლოცვა, ნატურალური პროდუქტებით კვება, მხიარული და კეთილი განწყობა ყველასა და ყველაფრისადმი“, - ეს გაცემული რეკომენდაციების ნაწილია.

ეკატერინე ქიმუცაძის თქმით, რომელმაც აღნიშნული რეკომენდაცია გასცა, ანალიზის აღება თბილისის კარდიოლოგიურ საავადმყოფოში არის შესაძლებელი. კლინიკა უზნაძის N49-ში მდებარეობს - საჯარო რეესტრის მიხედვით, შპს „ქ.თბილისის კარდიოლოგიური საავადმყოფო“ თბილისის მერიის საკუთრებაა.

ქიმუცაძესთან ვიზიტი 70 ლარი ღირს. შეკითხვაზე თუ რა სახის ლოცვებია რეკომენდებული, მისი განცხადებით, „ჩვეულებრივი „მამაო ჩვენოც" საკმარისია“.

მან მეტი ინფორმაციის მისაღებად Hemoscan.ge-ის შემოწმებაც გვირჩია. ვებგვერდის მიხედვით ქიმუცაძე ბიოლოგიურ მეცნიერებათა დოქტორი და ჰემოსკანირების სპეციალისტია. ამავე წყაროს თანახმად, ჰემოსკანირება საშუალებას გვაძლევს განვსაზღვროთ პლაზმისა და სისხლის ფორმიანი ელემენტების მორფოლოგიური ცვლილებების საფუძველზე ორგანიზმში მიმდინარე, უკვე ჩამოყალიბებული და მოსალოდნელი დაავადებები. დიაგნოსტირებას 15-20 წუთი ესაჭიროება, სამკურნალოდ ბიოლოგიურად აქტიური დანამატები გამოიყენება.

როგორც „ლიბერალი“ წერს, კარდიოლოგიური საავადმყოფოს დირექტორმა, თეიმურაზ შენგელიამ აღნიშნა, რომ ეკატერინე ქიმუცაძე, ნამდვილად მუშაობს კარდიოლოგიური საავადმყოფოს შენობაში, თუმცა კლინკის ექიმი არ არის, არამედ იქ ოფისი აქვს ნაქირავები.

„რამდენადაც ვიცი, ის ფუნქციურ დიაგნოსტიკას აკეთებს“, - ამბობს კლინიკის დირექტორი. მისი ინფორმაციით ეკატერინე ქიმუცაძე ბიოლოგია.

 

წყარო: „ლიბერალი“